Eitt bros getur dimmu í dagsljós breytt

Snillingur á hraðri uppleið

Thu, 27 Jan 2011 08:53:57 GMT

Stundum er maður svo bilaður... en það er a.m.k. gott að vita að ég er ekki ein.

Púkabaninn.

Stjórnlagaþing

Thu, 25 Nov 2010 20:47:51 GMT

Ætla ekki örugglega allir að kjósa?

Kurteisin

Wed, 03 Nov 2010 15:28:47 GMT

Fólk er kurteisara... kannski er þetta allt í hausnum á mér en ég finn mun. Veröld hinna grönnu er öðruvísi. Fólk er almennt kurteisara, stelpur taka meira mark á manni og strákar hleypa manni fram fyrir sig í röðinni, stoppa frekar á gangbraut og rukka ekki fyrir þjónustu. Ef þessi viðhorfsbreyting er ekki nóg þá get ég sagt ykkur annað.... Að hafa einu sinni verið 100 kg og verða svo grannur er eins og að hafa verið Pólverji á Íslandi og verða allt í einu Íslendingur. Allt í einu fer maður að heyra hvernig það er talað um feitt fólk þegar það heyrir ekki til. Ekki fallegt. Mér finnst verst hvað það er auðvelt að detta inní þetta, vera bara með. Fitubollubrandarar eru fyndnir, það verður að mega gera grín. Það er samt ansi takmarkað þegar grínið snýst um að feitt fólk sé illa gefið og þrífi sig ekki.

Ég er svo hissa á þessu tvennu: Að það sé í alvöru komið betur fram við mig núna því ég er léttari og hvað fólk leyfir sér að vera orðljótt í garð fólks í yfirþyngd. Offita er hvorki glæpur né þroskaskerðing, hún er birtingarmynd undirliggjandi vanda.

Ég tek ekki þátt í þessum fitufordómum, vertu með.

Að takast á við álag

Fri, 08 Oct 2010 16:32:57 GMT

Áður en maður getur byrjað að draga úr álagi, streitu og kvíða er mikilvægt að gera sér grein fyrir hvernig maður tekst venjulega á við álagið.
Óheilbrigðar leiðir til að takast á við álag:

Reykingar
Ofneysla áfengis
Að borða of mikið eða of lítið
Detta í doða fyrir framan sjónvarpið eða tölvuna (zone out)
Einangrun frá fjölskyldu og vinum
Lyfjanotkun til að slaka á (þ.m.t. verkjalyf)
Aukin svefnþörf
Frestunarárátta
Ofurskipulögð dagskrá
Taka stressið út á öðrum, reiðiköst, frekjuköst, andlegt ofbeldi

Rétt'upp hönd sem kannast við eitthvað af þessu.

Moment!

Mon, 14 Jun 2010 10:59:41 GMT

Augnablikið er mánudagsmorgunn á Hjarðarhaganum. Frídagur og allur heimsins tími.
Ræs kl.06:30. Ég gerði mér sojapönsu með bláberjum frá Hrönn frænku og nektarínum úr Hagkaup. Ég elska að þurfa ekki að flýta mér á morgnana, þess vegna vakna ég alltaf snemma, sama hvenær ég þarf að mæta einhverns staðar. Vilhjálmur fer til vinnu kl.07:10 en hefur fyrir því að koma upp með Fréttablaðið fyrir mig áður.

Ég hlusta á Morgunútvarpið á Rás 2, klára morgunmatinn (sem er alltaf jafn ótrúlega góður), drekk kaffibollann minn og fletti blaðinu. Ég vaska upp og legg mig svo aðeins aftur með góða bók, ekki oft sem ég hef færi á því. Núna opna ég tölvuna augnablik meðan ofnhreinsirinn leysir upp óhreinindin í ofninum. Það þarf að svara tölvupóstum og fullvissa sig um að umheimurinn sé enn þarna.... þarna fyrir utan litlu draumaveröldina mína.

p.s.
Muna að taka fisk úr frysti fyrir kvöldið.

205 sykurlausir dagar

Sun, 13 Jun 2010 14:07:53 GMT

200 daga myndin ;)

Enginn sykur, ekkert hveiti, engin sterkja í 205 daga í dag. Ég gæti ekki verið sáttari.

Hot damn, summer in the city!

Fri, 04 Jun 2010 13:17:35 GMT

Það er svo sannarlega sumar í Reykjavík... allt í blóma... ástin, batinn og ég.

Sólbað í Hellisgerði í Hafnarfirði

Lúxushádegismatur á sumardegi :)
Salami, hráskinka og ferskur motzarella ostur.
Bakað grasker, paprika, gulrætur og gráðostasósa. Omm Nomm! :)

Ofurstolt af rafvirkjanum mínum

Dagarnir fara í vinnu, sjósund, hjólatúra um alla borg, margra klukkustunda kaffihúsaspjöll við góða vini sem ég hef vanrækt í vetur, íslausa ísrúnta og endalausa hamingju. Body Balance í Baðhúsinu fyrir bakið sem lætur ekki segjast og áframhaldandi sjúkraþjálfun.

Enginn kippir sér lengur upp við að ég dröslist með vigtina mína út um allt... í veislur og út að borða, þannig er það bara... og á mánudögum milli fimm og sjö er ég upptekin því þá er ég í hóp.

Góða daga gott fólk :)

Sumarið í Reykjavík...

Wed, 26 May 2010 14:05:36 GMT

...verður vonandi bara fínt.

Sjósund í Nauthólsvík, endalaus sól, hjólatúrar um alla borg.
Bezt.

Tölfræðin

Fri, 21 May 2010 08:10:57 GMT

Ég man ekki hvort ég var búin að setja þetta hérna inn en geri það þá bara aftur. Mest svona fyrir þá sem eru að velta fyrir sér hvort ramminn virki og hvort það sé virkilega þess virði að lifa eftir þessu.

2003
júní/júlí: 95 kg. (Hæsta tala sem ég sá á vigtinni, fór örugglega hærra. Algjört stjórnleysi og gríðarlegt þunglyndi. Það er ekki auðvelt að bera vanmáttinn sinn utan á sér í öllum þessum kílóum)
2009
1.júní: 86.2 kg - Flutti heim frá Dk
21.nóvember: 77.3 kg - Byrjaði í meðferð hjá MFM
20.desember: 74.8 kg
2010
21.janúar: 73.0 kg
21.febrúar: 70.5 kg
21.mars: 70.2 kg
21.apríl: 68.9 kg
21. maí 67.9 kg

Easy does it. Ekkert ofát, ekkert svelti og engin uppköst. Bara þessi blessaði gullni meðalvegur og hjálp frá góðu fólki. Þeir sem vilja vita meira ættu endilega að snúa sér til MFM, GSA eða OA.

Því miður verður stórbætt andleg líðan ekki mæld í tölum en þeir sem umgangast mig finna vonandi muninn. Fólk er a.m.k. duglegt við að minnast á það og ég kann virkilega að meta það. Takk.

Góða daga

Vorboðinn

Tue, 18 May 2010 14:20:39 GMT

Námslánið er dottið inn þó síðustu einkunnina vanti. Restin kemur væntanlega þegar hún er komin í hús. Nú er ég aftur skuldlaus og ánægð með það. Kann ekki vel við yfirdráttinn, gott að vera laus við hann.

Einkunnin sem vantar er í Ofbeldi og Vanræksla í fjölskyldum. Hinir áfangarnir komu bara vel út.
Aðferðafræði 7.
Áföll, sorg og sálræn skyndihjálp 7,5.
Fjölskyldustefnur 8.
Félagsmálastefnur 8,5.

Ég vann fyrstu vaktina á virkum degi í gær. Ég held það verði voða fínt að vera á Grund í sumar. Ég verð bara einhvern veginn að einbeita mér að hverjum degi fyrir sig, ég laga víst ekkert aðstöðuna þarna einn, tveir og þrír... þó ég vildi gjarnan búa til svolítið meira pláss fyrir fólkið og betri vinnuaðstöðu fyrir okkur.

Ég skellti mér í sjósund í morgun. Hjólaði frá Hjarðarhaganum niður í Nauthólsvík, fór í sjóinn, pottinn og hjólaði svo aftur til baka. Fínasta æfing og alltaf jafn mikið sjokk að leggjast til sunds. Ég lít reyndar enn á þetta sem hugarleikfimi, eins og Boot Camp-ið til að byrja með... bara að fara, gera, þora.

Það er ótrúlega fínt að halda sig alltaf inni á þægindasvæðinu, gera aldrei neitt ögrandi, ógnvekjandi eða erfitt. Vera bara með "afsakanir fyrir öllu í heiminum"-bókina reiðubúna í hvert skipti sem eitthvað nýtt og spennandi ber á góma. Ég er hætt að nenna að vera sá gaur... manneskjan sem gerir ekki annað en að kvarta. Þegar ég fór að einbeita mér að því að nota frekar jákvæðan orðaforða og halda fýlunni bara fyrir mig fóru ótrúlegir hlutir að gerast. Fýla og vanlíðan er sjálfskaparvíti. Það er kannski ekkert auðvelt að komast út úr því en það er hægt. Hið sama má segja um matinn. Að læra að takast á við lífið án þess að borða yfir sig eða svelta er kannski ekki auðvelt en það er hægt, svo pant fara þá leið.

Gleðilegt sumar :)

Örfrí

Thu, 13 May 2010 20:01:26 GMT

Smá tími í Skagafirðinum, smá tími á Akureyri.
Knús frá mönnunum sem elska mig mest, litla og stóra. Heitir pottar, labbitúrar, sundferðir og óteljandi kaffibollar. Allt þetta líf og ekkert mál með matarstand. Mælt og vigtað þrisvar á dag virkar óyfirstígandi til að byrja með en núna er þetta minnsta mál í heimi.

Einkunnirnar detta inn og það er allt í fínu þar. Þrátt fyrir álag og stress og allt það virðist þetta vera á réttri leið. Ég mun aldrei skipta þessari líðan út fyrir sykur... nevah! ;)

Gleðilegan uppstigningardag.

Hvað er að frétta?

Wed, 12 May 2010 08:02:16 GMT

Ég datt pínu í lukkupottinn, fann danska peninga sem ég vissi ekki að ég ætti. Þeir fóru í föt.
Ég keypti mér gallabuxur nr.10/38 og kjól nr.12. Eitthvað sem ég lét mig ekki einu sinni dreyma um þegar ég var næstum því 100 kg. Ótrúlegt.

Átti frábæran dag með Ömmu Sirrý, Sólveigu og Söndru Hrafnhildi. Við ungu dömurnar fórum á Pisa og fengum alveg hrottalega góðan kvöldmat. Þjónustan var frábær, allar mínar sérþarfir minnsta málið. Ekkert hveiti, enginn sykur, mælt og vigtað.
"Er þetta eitthvað ofnæmi?"
"Nei, þetta er átröskunarmeðferð."
"Já, ok."

Ekkert mál og ótrúlega gaman. Vel verðskuldað kvöld með bestu stelpunum mínum.
Komin einkunn í Aðferðafræði, 7.0.
67 féllu, 180 náðu. Meðaleinkunn 5.8. Svo ég er sátt.

Fjórar tegundir starfsfólks

Mon, 10 May 2010 09:15:03 GMT

Þegar kemur að umönnun í öldrunarþjónustu eru til fjórar tegundir af starfsfólki.

1. "Ég vinn bara hérna"- týpan.
     Kemur vel fram við fólkið en hefur engar sérstakar skoðanir á neinu sem tengist umönuninni eða starfsemi heimilisins. Yppir öxlum yfir öllum ágreiningsmálum sem koma upp. Vinnur mest bara til að fá launaseðilinn.

2. Útbrunna týpan
    Fúli Skúli sem gerir allt með hangandi hendi, hefur allt á hornum sér. Góð við sumt heimilisfólkið, þegar vel stendur á. Dreifir biturð eins og fúlli prumpulykt.

3. Þrumuskýið/Gufan
    Gerir allt sem þarf að gera, yfirleitt mjög vel tæknilega séð en ekki af mikilli hlýju eða áuga. Stjórnast til að stjórna en ekki með hagsmuni heimilisfólksins í huga, oftast eigin hagsmuni. Fer ekki eftir fyrirmælum, býður ekki fram aðstoð að fyrra bragði, svarar bara bjöllum hjá "sínu fólki" og gerir heljarinnar mál úr því að hafa átt að "losna héðan" fyrir TVEIM MÍNÚTUM. (Þó sama fólk mæti oft aaaaðeins of seint.)

4. Jákvæða týpan
    Hefur gaman af því að vinna með öldruðum. Lætur sig hagsmuni þeirra varða. Sýnir þeim einlægan áhuga og virðingu. Þegir ekki um það sem betur mætti fara og reynir að miðla jákvæðni og árangursríkum samskiptum frekar en yfirvaldi og frekju. Finnst starfið gefandi og gefur af sér á móti.

Út frá eigin reynslu myndi ég áætla að þeir sem eiga heima í síðasta flokknum séu yfirleitt svona þrír á móti tuttugu. Hvenær ætlar einhver að segja eitthvað um ömurlegan aðbúnað aldraðra á Íslandi? Fyrsta elliheimilið á Íslandi var byggt af Hjálpræðishernum á Ísafirði í byrjun síðustu aldar og síðan hefur margt breyst til hins betra. Annað er aftur á móti beinlínis sorglegt. Ef þú átt aðstandanda sem býr á öldrunarstofnun, ertu viss um að það sé hugsað vel um viðkomandi?

Blessuð blíðan

Sat, 08 May 2010 13:48:55 GMT

She may be weary,
young girls do get weary,
wearing that same old shaggy dress.
But when she gets weary,
try a little tenderness.

Ég verð í gömlum kjól þar til námslánin koma. Ég er að nota yfirdrátt til að brúa bilið í fyrsta skipti á ævinni og get því ekki réttlætt neinar fjárfestingar nema matarinnkaup. Kannski verður kjóllinn sem ég mátaði í Rokk og Rósum enn til þegar ég á pening. Ef ekki þá verða alltaf aðrir kjólar, önnur tímabil þegar ég hef efni á hlutunum. Flíkur koma og fara, peningar líka. Þess vegna ætla ég að halda sem fastast í gildin mín, þau get ég átt alltaf. Mér líður miklu betur með þau en nokkurn dauðan hlut.

Fréttaskot

Fri, 07 May 2010 07:42:37 GMT

Ég er alveg að örmagnast en þetta er alveg að hafast. Nú er bara ein vinnuhelgi og eitt próf eftir. Þetta hlýtur að reddast.

Ég er búin að fá biðlistaúthlutun á Stúdentagörðunum. Það stefnir allt í að ég komist inn á Eggertsgötuna í haust, eða ég vona það svo sannarlega. Ég er nr.35 þangað inn, nr.30 inn á Lindargötuna inni í miðbæ. Ég vil frekar vera við skólann.

Það voru mælingar í Boot Camp í gær. Ég fékk að fara þó svo ég megi ekki æfa þar í bili. Strákarnir buðu mér m.a.s. að mæta þangað í mælingar áfram. Því ég vona svo sannarlega að mér takist að styrkja stoðkerfið svo ég geti klárað kortið mitt þar í sumar. Eins og er má ég bara lyfta því léttasta í tækjum sem bjóða uppá lokaðar hreyfingar, synda og labba. Engin hlaup, engar þyngdir.

Þá er nú eins gott að fituprósentan er komin niður í 21.6% og kílóin bara 68. Ég þarf ekkert að minnka meira. Kæri mig varla um það meðan ég hef ekki efni á nýjum fötum, það hangir allt utan á mér, þetta er að verða vandræðalegt. Mig sárlangar í sumarkjól.

Ef það hefur farið framhjá einhverjum þá er ég hætt að drekka. Ég kann ekkert með áfengi að fara, fyrir nú utan að það er sykur í því. Ég hætti 18.október 2009. Það gat verið svo voða heppilegt að nota áfengi í staðinn fyrir mat. Ekki sérlega skynsamlegt samt. Svo skál í vatni.