Það liggur við að maður fái samviskubit yfir því að vera bara í Danaveldi og hafa það fínt meðan fólkið mitt heima hamstrar dósamat í Bónus og eldsneytið í landinu er að klárast. Ég fylgist með á mbl. Þar er hægt að horfa á fréttamyndbönd með ansi mörgum fréttum. Erum við ekkert að grínast með að í myndbandinu um Guðna og Pútín sjást minnst FIMM alþingismenn vera að skrifa sms... (?!) meðan þeir sitja í þingsal og eiga að vera að einbeita sér að því að bjarga landinu frá því að fara á kaf í kreppunni. Þeirra á meðal er Björn Bjarnason. Þetta var eins og að horfa yfir kennslustund hjá áttunda bekk í grunnskóla. Skamm!
Ég hef svolitlar áhyggjur af peningum sem ég millifærði heim síðasta föstudag. Eða reyndi það réttara sagt. Þeir fóru út af danska reikningnum mínum en finnast nú hvergi heima þar sem öll viðskipti í erlendri mynt hafa verið fryst. Frábært. Ekki eins og ég kúki þessu. Ég vona að þeir birtist á endanum.
Ég vil samt frekar hugsa um eitthvað skemmtilegt. Eins og pakkann sem kom frá tengdó í Færeyjum í gær. Í honum var ýmislegt... eins og handklæði og uppþvottabursti. Hahaha. Mömmur og ömmur eru greinilega alls staðar eins. Best að senda eins og einn uppþvottabursta (sem er "made in china" og hefur á sínum tíma pottþétt verið fluttur frá Danmörku til Færeyja) með pósti til Danmerkur... því þeir eru eflaust af skornum skammti þar. Það komu ótrúlegustu hlutir upp úr þessum pakka en það besta var klárlega ÍSLENSKUR HARÐFISKUR. Vei.
Það var svo skemmtilegt skilningsleysi í samskiptunum á heimilinu þegar ég vildi fá harðfisk STRAX en nei.... hann átti að vera í kvöldmat.
"Hvað meinarðu maður?! Harðfiskur er bara eins og nammi, til að narta í, það er ekkert heil máltíð."
"Jú, með eplum"
Ég náði að segja eitt langt haaaa áður en ég mundi að epli eru kartöflur. Sagði svo bara aftur ha. Svo eftir að hafa sýnt meiri þolinmæði en ég vissi að ég ætti til (mig langaði svo ólýsanlega í harðfisk strax) fékk ég leyfi til að skammta mér á disk... harðfisk, smjör og soðnar kartöflur. Það þurfti bara einn bita og ég var seld. Hví gera Íslendingar þetta ekki? Þetta er ótrúlega gott.
Kartöflur. Good.
Smjör. Goood.
Harðfiskur. Gooooood.
Saman smakkast þetta alveg unaðslega. Skora á alla hafa harðfisk í kvöldmat.
Ég prófaði líka að setja hummus á harðfiskinn en það var ekki jafn gott.
Ég heimtaði náttúrulega að versla í matinn því ég var ekki að kaupa það að maður gæti bara haft harðfisk í kvöldmatinn. Svo þetta ljúfmenni lét sig hafa það að smakka sushi, lífrænt hummus, lífrænan cheddar ost og eina svarta ólívu áður en hann fór að háma í sig færeyska matinn sinn. Svo var að sjálfsögðu lífrænt öl með og lífrænn ís í eftirrétt. Svo gott, svo gott. Smá kveðjumáltíð.
Því nú stendur taskan við útidyrnar og ég er á leiðinni til Ítalíu. Mílanó fyrst, svo bílaleigubíll í nokkra daga og Mílanó aftur. Ég flýg til baka til Kbh 21.okt. Bölmóður verður eftir þar og flýgur svo til Íslands frá London 23.des.
Ég veit ekki hversu mikið ég kemst á netið úti en reyni að láta vita af mér reglulega. Ég verð með íslenska númerið mitt, skil það danska eftir hérna heima.
Farið vel með ykkur, hvar sem þið eruð. Ísland - Ástralía - Noregur - England - Svíþjóð - Danmörk.
Kossar.